बाळासाहेब सरवदेंच्या मुलांचा टाहो, “माझे पप्पा मला आणून द्या…”; अमित ठाकरे हेलावले, अश्रू अनावर
सोलापूर: सोलापूरमध्ये मनसे विद्यार्थी सेनेचे शहराध्यक्ष बाळासाहेब सरवदे यांच्या निर्घृण हत्येच्या घटनेने संपूर्ण महाराष्ट्र हादरला आहे. या घटनेनंतर मनसे नेते अमित ठाकरे यांनी आज (रविवार) सोलापुरात जाऊन सरवदे कुटुंबीयांची भेट घेतली. यावेळी शोकाकुल वातावरणात बाळासाहेब सरवदे यांच्या चिमुकल्या मुलांनी केलेला आक्रोश पाहून उपस्थितांचे काळीज पिळवटून निघाले. “माझे पप्पा मला आणून द्या,” असा टाहो फोडणाऱ्या मुलाला पाहून अमित ठाकरे यांनाही आपले अश्रू रोखता आले नाहीत.
नेमके काय घडले? सोलापुरातील जोशी गल्ली परिसरात शुक्रवारी (२ जानेवारी) मनसे पदाधिकारी बाळासाहेब सरवदे यांची हत्या करण्यात आली होती. मिळालेल्या माहितीनुसार, महापालिका निवडणुकीच्या पार्श्वभूमीवर उमेदवारी अर्ज मागे घेण्यावरून हा वाद झाला होता. भाजपच्या माजी नगरसेविका शालन शिंदे आणि त्यांच्या कुटुंबीयांनी बाळासाहेब सरवदे यांच्यावर धारदार शस्त्रांनी हल्ला केला. डोळ्यात चटणी टाकून हा हल्ला करण्यात आल्याचे समोर आले आहे. या हल्ल्यात सरवदे यांचा दुर्दैवी मृत्यू झाला.
अमित ठाकरेंची भेट आणि भावूक क्षण या घटनेची माहिती मिळताच अमित ठाकरे यांनी तातडीने सोलापूर गाठले. त्यांनी सरवदे यांच्या घरी जाऊन कुटुंबीयांचे सांत्वन केले. यावेळी बाळासाहेब सरवदे यांची मुले आणि पत्नीचा आक्रोश पाहून वातावरण अत्यंत गंभीर झाले होते. सरवदे यांच्या लहान मुलाने अमित ठाकरेंना पाहताच “माझे पप्पा मला आणून द्या,” अशी आर्त हाक मारली. हे दृश्य पाहून अमित ठाकरे भावूक झाले आणि त्यांच्या डोळ्यांत पाणी आले. त्यांनी मुलाला जवळ घेत धीर देण्याचा प्रयत्न केला.
“राजकारणासाठी जीव जाणं दुर्दैवी” यावेळी माध्यमांशी बोलताना अमित ठाकरे यांनी या घटनेचा तीव्र शब्दांत निषेध केला. ते म्हणाले, “राजकारण कितीही टोकाचे असू द्या, किंवा निवडणुका बिनविरोध करायच्या असू द्या, पण त्यासाठी कुणाचा जीव जाणे हे अत्यंत दुर्दैवी आहे. मनसे या कठीण प्रसंगी सरवदे कुटुंबीयांच्या पाठीशी खंबीरपणे उभी राहील.”
पोलिस तपास आणि कारवाई या प्रकरणी सोलापूर पोलिसांनी वेगाने हालचाली करत भाजपच्या माजी नगरसेविका शालन शिंदे, त्यांचे पती आणि मुलांसह एकूण १५ जणांवर गुन्हा दाखल केला आहे. यातील ५ मुख्य आरोपींना पोलिसांनी अटक केली असून पुढील तपास सुरू आहे.
