अमरावती : जिल्ह्याच्या शांततेवर कोणताही आघात होऊ नये, कायदा व सुव्यवस्थेची शृंखला अबाधित राहावी यासाठी अमरावती ग्रामीण पोलीस अधीक्षकांनी महाराष्ट्र पोलिस अधिनियम 1951 मधील कलम 37(1) व (3) अंतर्गत प्रतिबंधात्मक आदेश जारी केले आहेत. जिल्ह्याच्या सुरक्षेला कवच ठरणारा हा आदेश पोलिस आयुक्तालय क्षेत्र वगळता संपूर्ण ग्रामीण भागात लागू करण्यात आला आहे.
जिल्ह्याच्या सामाजिक वातावरणात कोणतीही ढवळाढवळ होऊ नये, सार्वजनिक शांततेला धक्का पोहोचवणारी कृती रोखली जावी आणि नागरिकांच्या दैनंदिन जीवनात सुरळीतता टिकून राहावी, या हेतूने प्रशासनाने हे पाऊल उचलले आहे.
सदर आदेश १४ डिसेंबर २०२५ च्या मध्यरात्रीपर्यंत लागू राहणार असून, या निर्देशांचे उल्लंघन करणाऱ्यांवर कायद्याने निर्धारित कठोर कारवाई केली जाईल, असा इशारा जिल्हादंडाधिकारी आशिष येरेकर यांनी दिला आहे. जिल्ह्यातील वातावरण संयत, सुरक्षित आणि जबाबदार नागरिकत्वाच्या आधारावर पुढे जावे, यासाठी प्रशासन पूर्ण क्षमेने सज्ज आहे.
