-सचिन इंगळे (प्रतिनिधी) अंजनगाव सुर्जी : बुद्धगया येथील ऐतिहासिक महाबोधी महाविहाराशी निगडित प्रश्नांच्या पार्श्वभूमीवर देशपातळीवर सुरू असलेल्या महाबोधी महाविहार मुक्ती आंदोलनाला सर्वत्र व्यापक पाठिंबा मिळत असतानाच, अंजनगाव सुर्जी तालुक्यातील बौद्ध समाजानेही या आंदोलनाशी एकजूट दर्शवित ठोस सामाजिक भूमिका घेतली आहे.
आंदोलनाच्या समर्थनार्थ आयोजित करण्यात आलेल्या दिल्ली मोर्चासाठी औरंगाबाद (संभाजीनगर) येथून भन्ते शाक्यपुत्र यांच्या नेतृत्वाखाली १०० श्रामनेर (बौद्ध प्रव्रजित) दिल्लीकडे प्रयाण करीत आहेत. या श्रामनेरांच्या प्रवास, भोजन व अन्य आवश्यक व्यवस्थांसाठी अंजनगाव सुर्जी तालुक्यातील बौद्ध उपासक-उपासिकांनी स्वयंस्फूर्तीने धम्मदान व आर्थिक मदत उपलब्ध करून दिली आहे.
या उपक्रमात निरंजन दत्तुजी वानखडे यांनी ५,००० रुपयांची देणगी देत पुढाकार घेतला. त्याचप्रमाणे कैलास धांदे यांनी १,५०० रुपये, भाऊराव वानखडे १,००० रुपये, सुप्रिया वानखडे १,००० रुपये, विशाखा महिला मंडळ (वानखेडे पेठ) यांनी १,००० रुपये तसेच तेजेंद्र वानखडे यांनी ५,००० रुपयांची आर्थिक मदत दिली आहे. या योगदानामुळे श्रामनेरांच्या दिल्लीपर्यंतच्या प्रवासाची तिकिटे, भोजन व्यवस्था तसेच अन्य आवश्यक सोयी सहजपणे पूर्ण होणार आहेत.
स्थानिक बौद्ध समाजाच्या वतीने व्यक्त करण्यात आलेल्या प्रतिक्रियेनुसार, हे धम्मदान केवळ आर्थिक मदतीपुरते मर्यादित नसून, बौद्ध धम्मातील करुणा, समता व सामाजिक न्यायाच्या मूल्यांशी निष्ठा व्यक्त करणारे आहे. शांततामय आणि कायदेशीर मार्गाने आपल्या मागण्या मांडण्याच्या आंदोलनाशी ऐक्य दर्शविण्याचा हा एक महत्त्वपूर्ण सामाजिक प्रयत्न असल्याचेही त्यांनी नमूद केले.
तालुक्यातील ज्येष्ठ उपासकांच्या मते, अशा प्रकारचे सामूहिक योगदान तरुण पिढीसाठी प्रेरणादायी ठरत असून, सामाजिक व धार्मिक प्रश्नांकडे जबाबदारीने आणि विधायक दृष्टिकोनातून पाहण्याचा संदेश देणारे आहे. दिल्लीकडे रवाना होणाऱ्या श्रामनेरांना शुभेच्छा देताना शांतता, शिस्त आणि संविधानिक चौकटीत आंदोलन करण्याचे महत्त्वही अधोरेखित करण्यात आले.
अंजनगाव सुर्जी तालुक्यातून मिळालेल्या या उत्स्फूर्त प्रतिसादामुळे महाबोधी महाविहार मुक्ती आंदोलनाला नैतिक बळ प्राप्त झाले असून, बौद्ध समाजातील संघटनशक्ती, ऐक्य आणि सामाजिक जाणीव यांचे प्रभावी दर्शन घडल्याची भावना नागरिकांमधून व्यक्त होत आहे.
