–सचिन इंगळे (प्रतिनिधी) अंजनगाव सुर्जी : अंजनगाव सुर्जी नगरपरिषदेच्या नगराध्यक्षपदाचे आरक्षण अनुसूचित जाती प्रवर्गासाठी निश्चित होताच शहराचे राजकारण धक्क्यातून भरकटले. मागील दोन वर्षे सत्ता गाठण्यासाठी बाशिंग बांधून बसलेले दिग्गज नेते आता हिरमडलेले दिसत आहेत, तर नव्या राजकीय समीकणांच्या जुळवजुळवीची धावपळ सुरू झाली आहे. शहरातील ४५ हजार मतदार आणि १४ प्रभागांची रचना आता पक्षांच्या हालचालींना वेग देत आहेत. दिवाळीनंतर निवडणुकीचा बिगुल वाजेल, अशी चर्चा गल्ल्यांतून उगम पावत आहे.
मागील निवडणुकीत भाजपने प्रचंड फरकाने आघाडी घेत एमआयएमला पराभूत करून नगराध्यक्षपदावर ताबा मिळवला होता, परंतु यंदा आरक्षणामुळे सत्तेचे गणित पूर्णपणे पलटणार आहे.
भाजप, काँग्रेस, शिवसेना (उद्धव गट), शिवसेना (शिंदे गट) आणि उबाठा पक्षांनी आपापल्या पायांवर बळकट मोर्चेबांधणी सुरू केली आहे. स्थानिक आघाड्याही उंबरठ्यावर उतरल्या आहेत. काँग्रेस-शिवसेना-उबाठा युतीची शक्यता खोडसाळपणे दिसते, आणि युती झाल्यास शिवसेना-उबाठा नगराध्यक्षपदासाठी आपला दावा ठोकू शकतात, तर राष्ट्रवादी काँग्रेस (शरद पवार गट) स्वतंत्र लढतीची तयारी करत असल्याची चर्चा आहे.
नगरसेवकांची संख्या वाढली आहे आणि अनुसूचित जाती आरक्षण यामुळे या वेळी पक्षीय नव्हे, तर स्वच्छ प्रतिमेच्या उमेदवारांना प्राधान्य मिळेल, असे मत राजकीय तज्ज्ञ व्यक्त करतात. त्यामुळे अनेकांचे राजकीय स्वप्न धुळीस जातील, अशी भीती सत्ताधारी गटांत पसरली आहे.
मागील चार वर्षांपासून नगरपरिषद प्रशासकांच्या ताब्यात राहिल्यामुळे विकासकामांचा श्रेयवाद आणि अपयश दोन्ही चर्चेचा विषय ठरत आहेत. निकृष्ट दर्जाचे सिमेंट रस्ते, आरोग्य विभागातील घनकचरा व्यवस्थापनातील त्रुटी, तसेच घंटागाडीच्या इंधन खर्चातील कथित घोटाळे या मुद्द्यांवर निवडणूक लढवली जाईल, अशी अपेक्षा आहे.
यंदा नगराध्यक्षपदासाठी थेट जनतेकडून निवड होणार आहे. त्यामुळे ही निवडणूक स्थानिक समस्यांवर केंद्रित, तापलेली, उत्साहवर्धक आणि नाट्यमय ठरणार आहे, असे दिसते.
