-सचिन इंगळे (प्रतिनिधी) अंजनगाव सुर्जी : अंजनगाव सुर्जी शहर सध्या एका गंभीर आणि दुर्लक्षित समस्येच्या छायेत सापडले आहे. शहराच्या रस्तोरस्ती, वसाहतींमध्ये, शैक्षणिक परिसरात तसेच दवाखाने व बाजारपेठेच्या आजूबाजूला भटक्या कुत्र्यांचा सुळसुळाट वाढत चालला असून नागरिकांचे दैनंदिन जीवन असुरक्षित बनले आहे. शांत आणि गजबजलेले शहर आता कुत्र्यांच्या भुंकण्याने आणि अचानक हल्ल्यांच्या भीतीने गडद झाले आहे.
पहाटे शाळेकडे निघणारी चिमुकली पावले असोत वा कामावर जाणारे नोकरदार नागरिक — प्रत्येकजण भीतीच्या सावटाखाली घराबाहेर पडत आहे. अनेक ठिकाणी कुत्र्यांच्या टोळक्यांनी दुचाकीस्वारांचा पाठलाग केल्याच्या घटना समोर येत असून त्यामुळे अपघातांचा धोका वाढला आहे. रात्रीच्या वेळी रस्त्यांवर ठाण मांडून बसलेले कुत्र्यांचे थवे वाहनचालकांसाठी मोठे आव्हान ठरत आहेत. काही नागरिकांना चावा घेण्याच्या घटनांनी तर भीतीला अधिकच धार दिली आहे.
या परिस्थितीबाबत नगरपरिषद व प्रशासनाकडे वारंवार आवाज उठवूनही ठोस पावले उचलली जात नसल्याने नागरिकांमध्ये तीव्र असंतोष पसरला आहे. भटक्या कुत्र्यांची नसबंदी, लसीकरण व पुनर्वसन यांसारख्या महत्त्वाच्या उपाययोजना केवळ कागदावरच मर्यादित असल्याचा आरोप नागरिकांकडून केला जात आहे. प्रशासनाची ही निष्क्रियता शहराच्या सुरक्षिततेला आव्हान देणारी ठरत आहे.
स्वच्छतेकडे होत असलेले दुर्लक्ष, कचऱ्याचे उघडे ढीग, तसेच हॉटेल्स व मांस विक्री केंद्रांमधून उघड्यावर टाकला जाणारा अन्नकचरा — यामुळे भटक्या कुत्र्यांना शहरात मुक्त वावर मिळत आहे. समस्या केवळ कुत्र्यांची नसून, ती व्यवस्थेतील दुर्लक्षाची आणि नियोजनशून्य कारभाराची असल्याचे नागरिक स्पष्टपणे बोलू लागले आहेत.
या पार्श्वभूमीवर भटक्या कुत्र्यांच्या प्रश्नावर तातडीने विशेष मोहीम राबवावी, नियमित नसबंदी व लसीकरण कार्यक्रम सुरू करावा, तसेच आक्रमक व जखमी कुत्र्यांसाठी स्वतंत्र व्यवस्था उभी करावी, अशी ठाम मागणी नागरिक करत आहेत. अन्यथा एखादी गंभीर दुर्घटना घडल्यास त्याची जबाबदारी नेमकी कोण घेणार, असा थेट सवालही अंजनगावकर उपस्थित करत आहेत.
शहरातील सुरक्षिततेचा प्रश्न आता दुर्लक्ष करण्याच्या पलीकडे गेला असून प्रशासनाने तातडीने जागे होऊन ठोस आणि परिणामकारक उपाययोजना राबवाव्यात, अशी एकमुखी अपेक्षा अंजनगाव सुर्जीतील सर्व स्तरांतून व्यक्त होत आहे.
