“तू बेरोजगार, माझ्या मैत्रिणींचे नवरे बघ…” पत्नीच्या टोमण्यांना कंटाळून समस्तीपुरात पतीची आत्महत्या
समस्तीपूर (बिहार): पत्नीच्या सततच्या टोमण्यांना आणि सासरच्या छळाला कंटाळून एका ३१ वर्षीय तरुणाने गळफास घेऊन आपली जीवनयात्रा संपवल्याची धक्कादायक घटना बिहारमधील समस्तीपूर जिल्ह्यात घडली आहे. दिग्विजय कुमार (वय ३१) असे मृत तरुणाचे नाव असून, तो यूपीएससी (UPSC) परीक्षेची तयारी करत होता. आत्महत्येपूर्वी त्याने चार पानी सुसाईड नोट लिहून ठेवली असून, त्यात पत्नी आणि सासरच्या मंडळींवर गंभीर आरोप केले आहेत.
नेमकी घटना काय? मिळालेल्या माहितीनुसार, ही घटना समस्तीपूरमधील पटवारी पोलीस ठाण्याच्या हद्दीतील हसनपूर सुरत गावात घडली. दिग्विजय कुमार याचा विवाह राधिकासोबत झाला होता. मात्र, लग्नानंतर काही काळातच त्यांच्यात खटके उडू लागले. दिग्विजय बेरोजगार असल्याने त्याची पत्नी राधिका त्याला सतत टोमणे मारत असे. “तू काहीच कमवत नाहीस, माझ्या मैत्रिणींचे नवरे बघ किती कमावतात, त्यांचे स्टेटस बघ,” असे म्हणून ती त्याचा मानसिक छळ करत होती, असा आरोप सुसाईड नोटमध्ये करण्यात आला आहे.
मुलीच्या विरहाने खचला होता दिग्विजय दिग्विजयच्या सुसाईड नोटनुसार, त्याच्या पत्नीची मोठी बहीण नेहा ही देखील या वादात आग ओतण्याचे काम करत होती. काही महिन्यांपूर्वी राधिकाचे वडील आणि भाऊ काही गुंडांना घेऊन घरी आले होते आणि त्यांनी दिग्विजयला मारहाण केली होती. त्यानंतर ते राधिका आणि त्यांच्या लहान मुलीला सोबत घेऊन गेले. तेव्हापासून दिग्विजयला त्याच्या मुलीचा चेहराही पाहू दिला नाही. व्हिडिओ कॉल केला तरी पत्नी मुलीला समोर आणत नव्हती. आपल्या पोटच्या गोळ्यापासून दूर झाल्यामुळे आणि पत्नीच्या सततच्या अपमानामुळे नैराश्यातून त्याने हे टोकाचे पाऊल उचलले.
सुसाईड नोटमध्ये वेदना मांडल्या दिग्विजयने लिहून ठेवलेल्या चिठ्ठीत आपल्या आई-वडिलांची माफी मागितली आहे. “मी एक चांगला मुलगा आणि चांगला भाऊ बनू शकलो नाही,” असे भावूक उद्गार त्याने काढले आहेत. पोलिसांनी घटनास्थळावरून सुसाईड नोट जप्त केली असून, मृतदेह शवविच्छेदनासाठी पाठवला आहे. या प्रकरणी पत्नी राधिका, तिची बहीण नेहा आणि सासरच्या इतर लोकांवर गुन्हा दाखल करून पोलीस पुढील तपास करत आहेत. बेरोजगारी आणि कौटुंबिक कलहातून घडलेल्या या घटनेने परिसरात हळहळ व्यक्त होत आहे.
