-सचिन इंगळे (प्रतिनिधी) अंजनगाव सुर्जी : देशाच्या ७५व्या प्रजासत्ताक दिनानिमित्त अंजनगाव सुर्जी येथील महाराष्ट्र जीवन प्राधिकरण (एमजेपी) कार्यालयात राष्ट्रभक्तीच्या वातावरणात ध्वजारोहण व देशभक्तिपर कार्यक्रम उत्साहात पार पडले. शासकीय कार्यालयीन परिसर देशभक्तीपर घोषणांनी व तिरंगी सजावटीने नटला होता.
कार्यक्रमाची सुरुवात सकाळी नियोजित वेळेत ध्वजारोहणाने झाली. उपस्थित मान्यवर व कर्मचाऱ्यांनी राष्ट्रध्वजाला मानवंदना देत राष्ट्रगीत गायन केले. यावेळी संविधानाच्या मूल्यांची जपणूक, नागरिकांची जबाबदारी आणि शासकीय सेवेत पारदर्शकता व कर्तव्यनिष्ठा या विषयांवर मार्गदर्शनपर मनोगते व्यक्त करण्यात आली.
कार्यालयातील अधिकारी, कर्मचारी व सहकार्यांनी एकत्र येत राष्ट्रीय एकात्मतेचा संदेश दिला. सार्वजनिक पाणीपुरवठा व्यवस्थेची जबाबदारी सांभाळणाऱ्या विभागाने नागरिकांना सुरक्षित व नियमित सेवा देण्याच्या वचनबद्धतेची पुनरुच्चार केला.
या कार्यक्रमास अतुल देशमुख, निलेश चिलात्रे (शासकीय कंत्राटदार), मंगेश चिलात्रे, श्रीराम फुलारी, दुर्गेश घोगरे, तुराब शहा, रविंद्र ढेंगे, देवानंद माकोडे, शुभम गवळी, प्रदीप राजस, रूपेश तायडे, विशाल काळपांडे, अविनाश राऊत, संकेत भेले, सखाराम येवले तसेच मनोज ढेंगे यांची उपस्थिती होती. सर्वांनी एकत्रितपणे राष्ट्रसेवेचा संकल्प व्यक्त केला.
कार्यक्रमाच्या शेवटी उपस्थितांना अल्पोपहार देण्यात आला. प्रजासत्ताक दिनानिमित्त शासकीय कार्यालयात साजरा झालेला हा सोहळा देशभक्ती, कर्तव्यभावना आणि सामाजिक बांधिलकी यांचा प्रत्यय देणारा ठरला.
